<$BlogRSDURL$>

Saturday, December 17, 2005



حبيب ساهير: دوکتور حميد نطقى'يه (ال يازما نومونه سى ايله)

دوکتور حميد نطقى'يه: ائينالى دانيشير

١- اولکر سؤنوب، دان اولدوزو پارلارکن
گؤز تيکه‌ره م، اوزاق، اوزاق يوللارا!
آرغين – يورغون کروانلارى گؤزله‌ره م...

باهار گونو اريده رکن قارلارى
ياماجلاردا گؤوه‌ره نده اوت، علف
بيلدير کؤچه ن چوبانلارى اؤزله‌ره م...

دره ‌لرده قيققيلدارکن ککليکلر
دورولارکن، «حوووض ترلان» سولارى
سرين- سرين شيمال يئلى اسه رکن

اوزاقلاردان سلاملارام، هر سحر:
- قارا لچک، چاديرالى دوللارى،
گوشوارالى، مخمل دونلو قيزلارى...

٢- گؤز گزديريب اوجالاردان شهره
توزلو يوللار، پالچيق ائولر، قبريستان
ظولوم ايچره، پاسلى بازار، شئه زيندان

آياق يالين، سولغون اوزلو اوشاقلار
«شاه چلبى» اوسته پالتار يويانلار،
کوللوکلرده، سومسونه ن ايت گؤره‌ره م...

٣- ياديمدادى، گليب- گئده ن دؤورانلار
اته ييمده «صفا باغى» وار ايدى...

گؤم- گؤى گوللو «باغمئشه» ده، چشمه‌ لر
دييرمانلار فيرلاداراق آخاردى

«رشيدييه» اطرافيندا، گزه رکن:
ساناردين کى، خزان بيلمز باهارى

ياشيم چوخدور آب-ي حيات ايچميشم
آتا بيگلر، غازان خانلار، صوفولار،
زئينب پاشا، ستتارخانلار گؤرموشم
ناحق يئره آخان قانلار گؤرموشم...

۴- بويانارکن، قيزيل سويا آخشاملار
گون چيخمادان اوز چئوئريب، او زامان،
آل اؤرپکلى، گون باتانا باخارام...

الوان- الوان داووديى‌له بزه‌نه ن
او موقددس پاييزى، من اؤزله‌ره م

گئجه‌لرى، بير تک چيراق يانديريب:
آيدينليغين کروانينى گؤزله‌ره م...

حبيب ساهير


This page is powered by Blogger. Isn't yours?