<$BlogRSDURL$>

Sunday, May 28, 2006



ايلله‌ر بويو بيزه حؤكوم سوردو فارس
اسير اولدوق٬ توي دويونله‌ر اولدو ياس
بويونداكي زنجيرله‌ري باسدي پاس
هاني يوللار٬ هاني ائلله‌ر٬ هاني يار؟


ماهني

قار اريدي٬ آخار سولار نيلله‌ندي
چاي چمه‌نده اؤجوك-بؤجوك ديلله‌ندي
باغ باخچادا يئنه بادام گول‌له‌ندي
هاني يوردلار٬ هاني ائلله‌ر٬ هاني يار؟

كيم آلنينا قارا يازي يازاندي؟
آز عؤمرومده قارا گونله‌ر اوزاندي
بورا غوربه‌ت٬ نه لاله شامقازان´دي
هاني يوردلار٬ هاني ائلله‌ر٬ هاني يار؟

گون قيزاردي٬ سولار اولدو زرنيگار
داشدان-داشا چالدي بيزي روزيگار
ياغيش ياغدي٬ يئنه گلدي ايلك باهار
هاني يوردلار٬ هاني ائلله‌ر٬ هاني يار؟

ايلله‌ر بويو بيزه حؤكوم سوردو فارس
اسير اولدوق٬ توي دويونله‌ر اولدو ياس
بويونداكي زنجيرله‌ري باسدي پاس
هاني يوللار٬ هاني ائلله‌ر٬ هاني يار؟

هانكي اوجاق گئچدي؟ هانكي اودلاندي؟
شئعير غزه‌ل دفته‌رله‌ري توزلاندي
دئمه‌ك اينسان حوقوقلاري يالاندي
هاني يوردلار٬ هاني ائلله‌ر٬ هاني يار؟

قار اريدي٬ سئل سولاري آتلاندي
دلي كؤنلوم هر دردله‌ره قاتلاندي
يازيق جيسميم ايينه‌له‌ره ساپلاندي
هاني يوردلار٬ هاني ائلله‌ر٬ هاني يار؟

حبيب ساحير ٤٨-١٢-٢٨

١- لاله و شامقازان تبريز´ين ياخينليغيندا كند و يئر آدلاريدير.


This page is powered by Blogger. Isn't yours?