Friday, January 21, 2005
ايسماعيل جميلی
پارساباد وئبلاگيندان
--------------------------------------------------------------------------------
قوجامان شاعيریمیز حبیب ساهير´ین خاطيره سینه یازیلمیش
دونموش آنلار داملا داملا اریدی
باغری داش آینالی قان یاش آخیتدی
یوکله ندی کدر کروانی قاتار قاتار
سوزولدو اومودسوز یورقون باخیشلار
اؤپدو بوز گولوشلری کؤوره ک دوداقلار
تومدو کؤلگه له نن آلا گؤزلرىیله ایلمکچی قیزلار
قاباردی اوره يی سولطان سهند´ین
نیسگیله بوروندو ماوی گؤزلو ساوالان
ماتم بولودلاری چؤکدو دورمادان
غریب بیر شاعيرین یاسیندا
حسرت بویالی رؤیاسیندا
او یيخیلماز قایا ایدی٬ سینه سی داغلی
بیر قوجامان چینار ایدی٬ یوردونا باغلی
شفقین آلتین تئللرىیدی
قیزیل اؤزن´ه نور ساچان
کؤوشنلرده ، تارلالاردا
بیر سونایدی قاناد چالان
تورونج رنگلی توزلو یوللاردا
بیر منزيل ایدی٬ تانینان
او بیر ار ایدی٬ چنلی بئل´دن سورگون اولان
باج وئرمه ین خانلارا
باش ایمه ین سولطانلارا
قول اولوب ساتیلمایان
سویونو دانمایان
اؤز ائلینه٬ اؤز دیلینده شئعر یازان
اؤزونو آزاد اينسان سانان
او آغ یئل٬ بیر نفس ایدی
او کؤنول دویان بیر سس ایدی
سسسیزلیک مئشه یه قوناندا
گرچکلر
قورخو کؤلگه سینده بوزلایاندا٬ دوناندا
او بیر شاعير ایدی٬ ائلینه باغلی
ائلینی قورویان٬ دیلینه باغلی
